الكيميا فيها عفريت

[b]الكيميا فيها عفريت

كتب على سلامة ٢٣/ ٥/ ٢٠١٠
هو الخوخ ماسخ ليه كده السنة دى..

قال يعنى السنة اللى فاتت

كان معسل..

ياااه..

تصدق..

نفسى أقول آه

بس بصراحة مكسل..

علمونا فى المدرسة

إن حصة الدين زى قلتها

مفيهاش نجاح وسقوط..

وكده.. كده

رايحين النار لما نموت

وعلمونا فى البيوت

إن الأدب يعنى السكوت

والمشى جنب الحيط

ويا داخل بين البصلة وقشرتها

من ساعتها

واحنا بنتفرج من بعيد

ونحلم من بعيد

ونحب من بعيد

ونستنى نشوف أخرتها..

وعلمونا ف الحكومة

إن فاتك الميرى

سف التراب..

وقالولنا إن الكيميا فيها عفريت

كلنا حوّلنا آداب..

حفظنا الأناشيد

وسقطنا فى الحساب..

على فكرة الحر السنة دى

فظيع.. فظيع

قال يعنى السنة اللى فاتت

كان طراوة..

ساكت ليه يا عنب

ما تقولى راحت فين الحلاوة..

واللّه ويحقلك يا قطن تحزن

ويجوزلك تبكى يا بلح

وإزاى نغنى للفرح

وانت يا خوخ

كل سنة بتمسخ..

ما تقولى ليه

كل ما بنضف شارع

يرجع تانى يتوسخ..

تسلم لمرورك محمود

تسلم اديكى ياقمر
عارفة مشكلة الراجل ده انت لازم الى بيقراه يكون عارفة وسامعه من قبل كده
عشان يسمع صوته فى اسلوبه ويسمع الموسيقى بتاع القصيدة
انا بحبه جدا لانى بسمعه كتير جدا
هو راجل حقيقى اوى وبصدقه اوى اوى
انا رغاية بس بصراحة حابة اكلمك
لانك الاسم صغيرة لكن احساسك كبيير اوى
واحساسك ده بكره هيتعبك اوى بس حافظى عليه اوى اوى اوى
وسؤال اخير
جربتى تكتبى قبل كده

اولا تسلمى لمرورك

نورتى الموضوع

ثانيا جربت بس دايما كنت بفشل

مافيش حاج اسمها كنت بفشل
انا اتعلمت حاجة ومش عارف هى صح ولا
لكن مريحانى
وهى انى مااكتبش غير احساسى
ومااعيش غير احساسى
ومااعملش غير احساسى
فطالما كتبتى احساسك
ماتستنيش حد يقولك اذا كان الى انتى كاتباه ده حلو ولا وحش
الاهم انك تكتبيه
ولو كاتبه حاجة ياحبذا لو وريتيهانى حتى لو فى رسالة خاصة
لو مش حابة حد يشوفها
انا رغاااي مووت
بس يالا بقى

بالعكس مش رغاية خااالص

خلاص ان شاء الله هبقى اوريكى حاجة

اوك

يا ريت تورينا كلنا ده لو مش هيضايقك يعني
وبعدين ما انا بكتب اي كلام بيجي في بالي
وبقول انه وحش
بلاقيكم بتقولوا ده جميل
عادي يعني

ماشى يا محمود

بشوف

وتسلموا ع الثقة اللى عطيتوهانى