يا ريت توطى صوت التليفزيون
كتب على سلامة ١٤/ ٢/ ٢٠١٠
اتفضل سعادتك..
تعمل مداخلة.. مداخلتين
الوقت وقتك..
اتكلم براحتك..
واحنا معاك..
مخرجين
ومقدمين
إرسالنا ممتد ف هواك..
حتى الصباح..
وكل شىء.. كل شىء
عشانك إنت يكون مباح..
يا ريت تكون كل الجراح..
ماتش كورة..
غنى يا عصفور الكنارى..
راح اللى راح..
ولا حد دارى..
الصوت جميل
تشويش مفيش..
ومفيش فواصل عندنا
طول ما إنتا هنا
الإعلان كمان ممنوع مفيش..
معاك يا فندم ع الهوا
بس إنت عيش..
وأول لسانك اللى بينقط عسل
ما يقول كرامة مصر
بعد إذنك حضرتك..
هاعيط بحرقة وشحتفة..
ولما أبص ع اللى باقى م الأمل
وألاقيه اختفى..
ننزل بغنوة الختام..
ونقول للناس باى باى سلام..
على فكرة..
من كام يوم كده
مش فاكر كان إيه فى الأيام..
كان فيه جنازة ع الهوا
مباشر
م المعهد القومى للأورام..
ليه حضرتك ماكلمتنيش..
ودخلت معانا بكلمتين
فى كام دقيقة..
ولا أنت بيزعجك صوت الألم
عشان حقيقة..
وبتقفل الشباك
إزاز وشيش..
طب شد اللحاف
دى الدنيا برد..
واطفى نور الأوضة
قبل الكلام
ما يقلب بجد..
وعشان الشمس ماتخشش
وتقلق منامك..
أوعى جنابك
تنسى الستاير..
على كل حال
مبروك الفوز ع الجزاير ومعلش سهرناك
اتفضل سعادتك
ارتاح ونام..
منقووووول عن المصرى.
[center]
الأحد فبراير 14, 2010 8:48 pm
