وسط البلد
كتب على سلامة ١٦/ ٥/ ٢٠١٠
على حد علمى
إحنا وإسرائيل حبايب
وفيه سلام ومفيش حرب...
طب الظباط والعساكر دول
بيعملوا إيه بقى فى ميدان طلعت حرب..؟
دى وسط البلد..
وبنت وولد..
نازلين يشوفوا بلوزة تليق ع الإيشارب..
بيحلموا وبيغنوا..
وأجمل ما فى غناهم
إنه طالع من القلب..
قوللى..
من إمتى العشق كان بيموت من الخوف..
ومن إمتى الحلم كان بيخاف من الضرب..
يا كابتن.. يا باشا..
خليك ابن بلد..
هوه انت معندكشى إخوات..
صبيان..
ولا بنات..
يعنى إنتو كل عليتكو ظباط..
يعنى إنتم أصحاب أكاديمية الشرطة
وأصحاب الشوارع..
والميادين والمحلات..
وأصحاب البلد
طب أنا هاخرم من التحرير..
لدار القضاء العالى..
هاكل كشرى وأخش السيما
مالك بقى ومالى..
معايا بطاقة وخلصت الجيش
بتسمى ده أكل عيش
يبقى عرفتك..
طب عرينى..
فتشنى..
قطعلى هدومى
وافحصنى..
واتفرج على أحزانى
وخلصنى..
عارف..
أنا مرة القطر عدى وداسنى
وما موتش..!
عشق الحياة مهوش ترف..
عرفت إيه معنى الشرف..
جتك القرف..
جتك القرف..
[center]
السبت مايو 22, 2010 10:36 am