منتدي كلية الاداب جامعة الفيوم
اشترك معانا في منتدانا تفيدنا ونفيدك واكيد ان شاء الله هيعجبك
اتفضل اشترك
منتدي كلية الاداب جامعة الفيوم

 
البوابةالرئيسيةس .و .جالأعضاءالتسجيلدخول
اهلا بكم في منتدي just for you * يا رب تستفيد معانا وتفيدنا بمواضيع وردودك علي المواضيع
 مع تحيات ادمن المنتدي


شاطر | 
 

 الحقوا يا ناااااااااااااااااااس .. الإمتحان اتسرب !!!

استعرض الموضوع السابق استعرض الموضوع التالي اذهب الى الأسفل 
كاتب الموضوعرسالة
Kind Girl
عضو مميز
عضو مميز
avatar

انثى الحصان
عدد المساهمات : 957
تاريخ الميلاد : 18/02/1990
تاريخ التسجيل : 13/10/2010
العمر : 27
العمل/الترفيه : مش لاقيه شغل
المزاج : الحمد لله

مُساهمةموضوع: الحقوا يا ناااااااااااااااااااس .. الإمتحان اتسرب !!!   الإثنين سبتمبر 26, 2011 8:28 pm

[ندعوك للتسجيل في المنتدى أو التعريف بنفسك لمعاينة هذه الصورة]

ارجوكم اقرأؤها للأخر
لما الدكتور في مرة في الكلية... بيقول أنا هعمل محاضرة هقولكم فيها على شوية اسئلة هيجي منها في الامتحان.
الطلبة بتبقى هتموت من الفرحة ، وكلهم بيحضروا المحاضرة ،
ويكتبوا الاسئلة ويذاكروها صم ..
ليه ياعم ؟
أصلها أكيد جاي منها في الامتحان ، يبقى لازم تذاكرها !
اللي مش هيذاكرها يبقى غبي ، ده حتى غبي كلمة كويسة في حقه !

تخيلوا لو جبنا طلبة ثانوية عامة، وما ادراكم ما طلبة ثانوية عامة ،
وقولنالهم الامتحان اتسرب والاسئلة دي جاية بكرة مليون في المية في الامتحان ..
هيتصرفوا ازاي؟؟
هيباتوا ليلتها صاحين ياكلوا الكتب ، اصلها ثانوية عامة يا عم الحج مش لعبة ،
واللي يعرف اسئلة ثانوية جاية في الامتحان وميذاكرهاش يبقى (طور) ولا مؤاخذة يعني !



طيب بعد الحكم الشنيع اللي انتو بنفسكم حكمتوا بيه على ( الطلبة المجانين رسميا ) في الامثلة اللي فاتت ،
لو قولتلكم إن ربنا أخبرنا بالاسئلة اللي هنمتحن فيها ونتسألها في امتحان الأخرة ،
ومع ذلك مذاكرناش ، ولا حتى حطينا في بالنا ان ميعاد امتحان اي حد فينا ممكن يبقى في وقت أقرب مما يتصور !

أصل فيه شاب عايش حياته بيقول : انا امتحاني لما ابقى فوق سن الستين ..مش النبي هو اللي قال ان اعمار امته ما بين الستين والسبعين؟ ابقى ساعتها ادخل الجامع وابات فيه كمان !
وميعرفش المسكين ان النبي برده اخبر عن موت الفجاة وانتشاره وانه من علامات الساعة وان احتمالات موته في اي لحظة في الزمن ده وهو على معصية = 100 %

وفيه بنوته استايل بتقول: انا لما اتجوز واكبر وابقى قد ماما هبقى البس الخمار أوالطرحة الطويلة علشان طول ما انا صغيرة لازم ابقى استيل وشيك ومهتمة بمظهري !
ومتعرفش المسكينة ان احتمالات انها تموت قبل الجواز مش قبل ما تبقى زي ماما ، بل حتى قبل ما تخلص كليتها = 100 %


امتحان الأخرة يا شباب!!


امتحان الاخرة اللي كل واحد فينا معرض انه يدخله في اي لحظة ، جهزناله ازاي ؟؟
ربنا ادانا الأسئلة ، المجنون هو اللي هيعرف الاسئلة وميجهزلهاش اجابة !

كل واحد هيتسأل في سبع أسئلة لازم هتتسأل فيهم يعني هتتسأل فيهم، مفيش مفر ، مصيرك مش هيتحدد غير لما تجاوب على الأسئلة دي !


3 في القبر :
من ربك ؟ وما دينك ؟ ومن نبيك ؟

و4 في أرض المحشر :
عمرك فيما افنيته ؟ شبابك فيما ابليته ؟
مالك من اين اكتسبته وفيما انفقته ؟ علمك ماذا عملت به ؟


تعالوا نشوف الاسئلة بالتفصيل..


من ربك ؟؟؟

هتقول إيه ؟؟ تعرف تتكلم 5 دقايق بس عن ربنا ؟؟
ولا حتى دقيقتين !!!
ولو اتكلمت تلاقى الكلام ضعيف و متلصم ولو حاولت تزود في الكلام هتلاقيك بدأت تغلط !!
هل لإنك مبتعرفش تتكلم ؟
...لا ، أبدا ً ...
بدليل أنك ممكن تتكلم عن الموبايلات بالساعة , والعربيات بالساعتين , ومع البنات على الشات بالثلاث أو الأربع ساعات ..
يبقى المشكلة في إيه ؟
عدم تعمق معرفة الله في قلب كل واحد مننا ..
بأن الخالق المدبر المهيمن هو الله ... أن المعبود بحق هو الله وحده لا شريك له...
أن من له الأمر والنهى والحكم والطاعة هو الله ...أن من نلجأ إليه وندعوه ونستعين به هو الله ..
أن من نخشاه والهدف الأول في حياتنا إرضاؤه هو الله ...
ولكن المشكلة أن كثيرا مننا بيعبد أشياء أخرى ... في مننا اللي بيعبد نفسه ومننا اللي بيعبد شهوته ومننا اللي بيعبد حبيبته أو زوجته ... فلو عبدنا الله لاشتقنا لسماع الكثير عنه ولعرفنا الكثير عنه سبحانه وتعالى ...وبالتأكيد وقتها هنعرف نتكلم عن الله ...
امتى هتحاول أنك تعرف أكثر وأكثر عن ربنا وتعيش حياتك خالصة لله طالباً بأعمالك رضا الله وأنت في كل أحوالك مستعين بالله ...
عرفت دلوقتي مين ربك ؟؟



ما دينك ؟؟
دين كثير مننا .... هو الدين اللي على مزاجه ... دين على الهوى ... دين بالتقسيط ...
كل واحد بيأخذ من الدين اللي يحبه ويسيب اللي مش على مزاجه ...
واحدة تأخذ صلاة وصوم وصدقة ولكن تقولك مقدرش اغير لبسي هو كده كويس ..!
شاب يأخد الصلاة والصوم والقرآن ولكن يقولك الاغاني حلال ومصاحبة البنات حلال والدين يسر ...
كل واحد ماشي على هواه ...
قال تعالى : {{أَفَرَأَيْتَ مَنِ اتَّخَذَ إِلَهَهُ هَوَاهُ وَأَضَلَّهُ اللَّهُ عَلَى عِلْمٍ وَخَتَمَ عَلَى سَمْعِهِ وَقَلْبِهِ وَجَعَلَ عَلَى بَصَرِهِ غِشَاوَةً فَمَن يَهْدِيهِ مِن بَعْدِ اللَّهِ أَفَلَا تَذَكَّرُونَ }}الجاثية23
مينفعش ناخد من الدين اللي على مزاجنا ونسيب اللي نكرهه ،
بل لازم ناخد الدين كله كما امرنا الله وليس كما امرتنا اهوائنا ولا نتبع خطوات الشيطان في التفريط في الدين بالتدريج قال الله تعالى : {{ يَا أَيُّهَا الَّذِينَ آمَنُواْ ادْخُلُواْ فِي السِّلْمِ كَآفَّةً وَلاَ تَتَّبِعُواْ خُطُوَاتِ الشَّيْطَانِ إِنَّهُ لَكُمْ عَدُوٌّ مُّبِينٌ }}البقرة208

فلو تخيلنا أنك بتشتغل عند مدير معين ،هل هتنفذ اللي المدير عايزه ولا اللي انت عايزه ؟
طبعا اللي هو عايزه.. و إلا لو عملت اللي انت عايزه هيرمي شغلك فى وشك ويطردك من الشغل...
ولله المثل الأعلى .. انظر إلى معاملتك لله سبحانه وتعالى ومع ذلك؛ ربنا بيعاملك بحلمه ورحمته وفضله ويستر فيك وينعم عليك ، وانت برده ماشي على مزاجك !

عرفت دلوقتي ما دينك ؟؟؟



من نبيك ؟
وقبل ما تجاوب ..فاكر يوم ما النبي صلى الله عليه وسلم حبيبي وحبيبك اتشتم قدام العالم كله ، عملت ايه يوميها ؟؟
هل التزمت وقدمت نفسك لله لخدمة الدين .. ولا ( كبرت ) دماغك وبدلا من الرد عليهم دخلت في نفس اليوم لمواقعهم الإباحية وحملت أفلامهم وسمعت أغانيهم وعشت عبد ليهم ؟؟؟
مين قدوتك فى الدنيا ؟ الممثل الفلاني , اللاعب الفلاني ,
و أنتى مين قدوتك؟ الممثلة الفلانية , المطربة الفلانية ..
امتى كان رسول الله – صلى الله عليه وسلم – قدوتك في حياتك ؟ امتى اقتديت بيه واتبعت سنته ؟ امتى تشبهت به ؟
و أنتى امتى كانت أمهات المؤمنين - زوجات النبي -قدوتك في حياتك وتشبهتي بهن؟
ياترى لو شفاك النبي وانت مسقط البنطلون ولابس الحظاظة وعامل دوجلاس هيعرفك ؟؟
هيقول ده من امتي ؟؟
ياترى لو شافك النبي وانتي لابسه البدي والجينز والفيست هيعرفك؟؟
هيقول دي من امتي؟؟
دول شباب امتي اللي اتضربت واتعذبت واترميت بالحجارة علشانهم..علشان اوصلهم الدين .. علشان انجيهم من عذاب جهنم .. هما دول ؟؟؟
كل ده وبتفكر إنك هتجاوب بكل سهولة وتقول نبيي هو محمد – صلى الله عليه وسلم – ؟
الدين مش بالكلام ؟
معقول هتتساوى مع اللي عاش وأهم قضية في حياته نصرة الدين ونصرة النبي صلى الله عليه وسلم وعاش لخدمة الإسلام والدفاع عنه وغيره عاش لشهواته ونزواته : {{ أَفَمَن كَانَ مُؤْمِناً كَمَن كَانَ فَاسِقاً لَّا يَسْتَوُونَ }}السجدة18

عرفت دلوقتي من هو نبيك ولا لسه ؟؟


عمره فيما أفناه ؟؟

عمر كل واحد فينا هو رأس ماله يا جماعة ..هو بضاعته اللي بيتاجر بيها للأخرة ..
فاللي ضاعت بضاعته، وانتهى رأس ماله من غير ما يحقق الربح، فهو من الخاسرين!!!
الايام عماله تجري بيك وتعدي من عمرك وانت ولا انت هنا..
بل بتحاول تقتل وقتك على القهاوي وقدام الفيس ونايم 24 ساعة !
كل يوم بيعدي وانت عمال تبعد عن ربنا اكتر واكتر !!
مفيش مرة وقفت فيها مع نفسك وقولتلها : ضاع من عمري كتييييييييييييير اووووووووي !
نتوب بقى قبل فوات الاوان ..
سيدنا عبد الله بن مسعود كان بيقول : ( والله ما ندمت على شيء كندمي على يوم طلعت شمسه نقص فيه أجلي، ولم يزد فيه عملي )
ربنا ماادكش العمر ده علشان تضيعه ، بل علشان تستغل كل لحظة فيه في انك تجمع حسنات و تستعد للأخرة !ياترى هتقول لربنا ايه لما تتسأل السؤال ده ؟؟!



وعن شبابه فيما أبلاه ؟؟

شبابك وصحتك وقوتك ضيعتهم في ايه ؟؟
على الكورنيش والفسح مع البنات ، ولا في الرقص في حفلات تامر وعمرو ؟؟
ولا استغليتهم في انك تكون شاب نشأ في طاعة الله ، وقضيتهم في المساجد ، وخدمة ابوك وامك وحفظ القران والدعوة وبقية الطاعات ..؟؟
ياترى هتقول لربنا ايه لما تتسأل السؤال ده ؟؟!


وعن ماله من اين اكتسبه وفيما انفقه؟؟

الفلوس..الرزق ..اللي انت عمال تجري يمين وشمال وتعمل فيها فهلوي وتجيب القرش بأي طريقة ومش همك حلال ولا حرام..
هتتسأل عن كل مليم ..جبته منين ؟؟ وصرفته في ايه ؟؟
جيبته من رشوه ؟؟ ولا ربا ؟؟ ولا كنت فاتح موقع اغاني وافلام ؟؟ ولا كنت بتغش الناس وتنصب عليهم ؟؟
للاسف اللي بيطلب الرزق بالحرام ده أغبى الاغبياء..غبي غبي صرف يعني..
اصل الرزق الحاجة الوحيدة اللي ربنا تكفل بيها لجميع المخلوقات ..وهيجيلك هيجيلك لحد عندك بالحلال مفيش قرش هيزيد ولا هينقص ..تقوم انت تستعجل وتجيبه بالحرام ! يبقى انت غبي !
وبعد كده صرفته في ايه باشا ؟؟ وصرفتيه في ايه بنوته ؟؟
في السجاير والخروجات والسينيمات واللبس والميك اب !!
ياترى هتقول لربنا ايه لما تتسأل السؤال ده ؟؟!


وعن علمه ماذا عمل به ؟؟

كل كلمة قريتها في كتاب..كل كلمة سمعتها من شيخ او من اي حد عن الدين ،
كل معلومة ربنا وصهالك بأي طريقة ،
هتتسأل عملت ايه بيها ؟؟
عملت ايه بالعلم ؟؟
اشتغلت بيه وطبقته فعلا ..ولا يا عم كبر الدي وروق الجي !!
ياترى هتقول لربنا ايه لما تتسأل السؤال ده ؟؟!



مش عايز اطول اكتر من كده ..
بس بعد لما فكرتك بالأسئلة اللي انت اصلا المفروض عارفها ، والمفروض برده انك تكون مستعد انك تمتحن فيها في اي لحظة ، وانت برده لسه مُصِرّ انك تتجاهل ، يبقى انت الخسران الوحيد في الليلة دي كلها..

بس نصيحتي ليك ، قلّب الكلام في دماغك تاني ، وزي ما بتحسب الفلوس صح، احسبها هنا كمان صح ،،

وشوف اخرتها ايه لو مجهزتش إجابات للأسئلة ..

اقولك أنا ..

اخرتها ****************> جهنم !

الطريق اللي انت ماشي فيه ده ملوش غير نهاية واحدة ..وانت عارف كده وبرده بتقاوح !!!

خاف على نفسك في الاخرة من النار زي ما بتخاف عليها في الدنيا من اقل لسعة!
فوق بقى ، كفاية توهان !!

يلا كل واحد يقوم يتوضا ويصلي ركعتين ، يجدد فيهم التوبة لربنا ،،

ويعاهده انه يبدأ حياة جديدة ، حياة والله العظيم - بحلفلك بالله - مش هتلاقي فيها غير الراحة والسعادة ،،

لأنها أحلى حياة في طاعة الله ،،


منقول لامانه

*****************************************
[ندعوك للتسجيل في المنتدى أو التعريف بنفسك لمعاينة هذا الرابط]
الرجوع الى أعلى الصفحة اذهب الى الأسفل
 
الحقوا يا ناااااااااااااااااااس .. الإمتحان اتسرب !!!
استعرض الموضوع السابق استعرض الموضوع التالي الرجوع الى أعلى الصفحة 
صفحة 1 من اصل 1

صلاحيات هذا المنتدى:لاتستطيع الرد على المواضيع في هذا المنتدى
منتدي كلية الاداب جامعة الفيوم  :: اسلامنا جميل :: اسلامنا جميل-
انتقل الى: